Portugalia ndalon 'vizat e arta' për qytetarët rusë

Portugalia njoftoi një ndalim të plotë të lejeve të qëndrimit në këmbim të investimeve të njohura edhe si 'viza të arta' për qytetarët rusë, si pjesë e sanksioneve të BE-së të vendosura ndaj Rusisë për luftën e saj të paprovokuar të agresionit të zhvilluar në Ukrainë.

Portugalia kishte lëshuar gjithsej 431 'viza të arta' për rusët, duke përfshirë shtatë që nga fillimi i këtij viti, dhe thuhet se ka tërhequr 277.8 milionë euro (281.4 milionë dollarë) investime që nga fillimi i programit të privilegjuar të vizave.

Por, sipas raportimeve të mediave portugeze, gjithsej dhjetë shtetas të Federatës Ruse që aplikuan për 'vizat e arta' të Portugalisë janë refuzuar që kur Moska urdhëroi forcat e saj të armatosura të sulmonin fqinjin e saj demokratik, properëndimor.

Sipas raporteve të mediave të Portugalisë, qytetarët ukrainas kanë marrë 51 leje qëndrimi në këmbim të 32.5 milionë euro (33 milionë dollarë) investime që nga fillimi i programit.

Mbi 60 programe të privilegjuara të vizave për marrjen e shtetësisë ose lejeve të qëndrimit në këmbim të investimit ekzistojnë në të gjithë botën.

Pas sulmit brutal të Rusisë ndaj Ukrainës, disa vende evropiane, përfshirë Republikën Çeke dhe Maltë pezulluan programet e tyre.

Ndërkohë, autoritetet në Greqi kanë dyfishuar shumën minimale të investimit të kërkuar për marrjen e vizës së artë nga 250,000 euro (253,800 dollarë) në 500,000 euro (507,600 dollarë).

Disa shtete të BE-së kanë propozuar gjithashtu një ndalim të plotë të të gjithë shtetasve rusë që të hyjnë në Bashkimi Europian.

Pak ditë më parë Letonia, Estonia, Lituania dhe Polonia njoftuan se nuk do të lejojnë më hyrjen e turistëve rusë me viza Shengen, duke filluar nga 19 shtatori. Ndalimi i përgjithshëm bën përjashtim për udhëtimet për arsye humanitare.

Megjithatë, Portugalia kundërshtoi vendosjen e një ndalimi të plotë për qytetarët rusë që të hyjnë në Bashkimin Evropian.

“Portugalia konsideron se objektivi themelor i regjimit të sanksioneve duhet të penalizojë makinën ruse të luftës, por jo popullin rus”, tha ministria e jashtme e vendit.

Deri më tani, blloku evropian nuk ishte në gjendje të binte dakord për një ndalim të plotë të rusëve, duke u kufizuar për momentin në pezullimin e regjimit të thjeshtuar të vizave me Rusinë.