Zjarri i madh shpërtheu në një ndërtesë komerciale katërkatëshe në kryeqytetin indian Nju Delhi në orët e vona të pasdites të së premtes, duke bllokuar dhjetëra njerëz brenda.
Të paktën 27 persona humbën jetën dhe dhjetëra u plagosën në ferrin që kishte nisur në katin e parë të ndërtesës, ku ndodhet zyra e një kompanie të prodhimit të kamerave të sigurisë dhe ruterave, sipas një zyrtari lokal.
"Numri i përgjithshëm i të vdekurve është 27. Operacioni i kërkimit është në vazhdim," tha një zyrtar i departamentit të zjarrfikësve.
Sipas një zëvendës shefi të zjarrfikësve nga Nju Delhi shërbimi zjarrfikës, personat e bllokuar ishin hedhur nga godina që digjej për të shpëtuar jetën e tyre.
“Mbi 35 persona janë plagosur, përfshirë ata që u hodhën nga ndërtesa,” tha zyrtari.
Përafërsisht 60 deri në 70 njerëz janë shpëtuar, tha policia, me më shumë se 40 persona të djegur që u dërguan në një spital lokal.
Kati i tretë i ndërtesës nuk është kontrolluar ende dhe pritet të nxirren kufoma të tjera, tha shërbimi zjarrfikës i Delhi.
Kryeministri Narendra Modi tha se ishte jashtëzakonisht i pikëlluar nga humbja e jetëve.
Zjarret janë të zakonshme në Indi, ku ligjet e ndërtimit dhe normat e sigurisë shpesh injorohen nga ndërtuesit, banorët dhe zyrtarët e korruptuar.